Um Molann

Ungmennahúsið Molinn hóf starfsemi sína í maí 2008. Molinn tók til starfa í nýrri og fínni byggingu á menningarholtinu ásamt hinum menningarstofnunum bæjarins. Molinn deilir húsnæði ásamt Tónlistarsafni Íslands sem er staðsett á neðri hæðinni.

Molinn er ætlaður ungu fólki á aldrinum 16-25 ára og skiptist starfsemin í aðalatriðum í þrennt:

Í fyrsta lagi má nefna menningarlega viðburði. Molinn býður upp á aðstöðu fyrir alls konar listir til að blómstra, má þar nefna tónlist, myndlist, leiklist og ritlist. Hugmyndin er að þar geti ungt fólk bæði stundað sínar listir og nýtt sér aðstöðuna til að flytja afrakstur sinn og koma sér á framfæri. Í Gallerí Sykri fá ungir listamenn notið sín og haldið sýningar. Einnig er aðstaða í húsinu til ýmis konar útgáfu, og umbrots- og myndvinnsluforrit sem nýta má í hvers kyns útgáfu á stuttmyndum, bæklingum, blöðum, tónlist og fleiru.

Í öðru lagi er ungmennahúsið félagslegur staður sem býður upp á jákvætt og vímulaust umhverfi og afþreyingu. Hægt er að kíkja á kaffihús í Molakaffi og gæða sér á veitingum gegn vægu verði, hitta vini eða lesa bækur og blöð. Í húsinu er þráðlaus aðgangur að netinu og gestir geta fengið afnot af tölvum. Íþróttaviðburðir og annað sem áhugi er á eru sýndir á breiðtjaldi en auk þess er aðstaða fyrir margs konar menningarviðburði eins og ostakvöld, LAN-mót, ljóðalestur, gjörninga, málþing, LARP (live-action-role-playing) og hlutverkaspil, og annað skemmtilegt sem fólki dettur í hug. Molinn hefur einnig yfir að ráða pool-borði sem öllum er frjálst að spreyta sig á, sem og forláta fússballspili fyrir gesti og gangandi.

Í þriðja lagi er boðið upp á ýmsa þjónustu fyrir ungt fólk. Bryddað er upp á nýjum og skemmtilegum námskeiðum allan veturinn, bæði opnum og lokuðum. Alltaf er hægt að fá  ráðgjöf og hjálp í tengslum við atvinnu- og námsleit innanlands og utan. Einnig aðstoðar starfsfólk Molans við að koma á tengslum við fagaðila ef þess er óskað. Ungar, verðandi mæður eru með stuðningshóp, og margt fleira.

Á sumrin sér Molinn um Skapandi sumarstörf á vegum Kópavogsbæjar. Um er að ræða átta vikur þar sem ungum og skapandi kópavogsbúum gefst kostur á að vinna við eigin hugmyndir. Þetta er tilvalið fyrir framtaksama einstaklinga eða hópa sem hafa brennandi áhuga á því að starfa sjálfstætt og glæða bæinn lífi með alls konar listum.