Það er nóg um að vera fyrir 16 ára og eldri í Molnaum í sumar. Molinn mun standa fyrir fjölbreyttri dagskrá sniðin að þörfum ungs fólks. Atvinnumöguleikum ungs fólks hefur fækkað mjög undanfarin ár. Kópavogsbær hefur reynt að stemma stigu við þessu með því að fjölga ráðningum í sumarstörf bæjarins. Nú er það svo að flestir umsækjendur fá starf, en algengt er að búið sé að stytta vinnuvikuna og ekki unnið á föstudögum.

Í Molanum er lögð mikil áhersla á að þátttakendur í starfinu fái tækifæri á að móta starfið og hafa á áhrif á það sem er í boði. Á vordögum voru ýmsar hugmyndir viðraðar og ljóst að allir munu finna eitthvað við sitt hæfi. Lögð verður áhersla á föstudaga en þar að auki er möguleiki á að halda viðburði virk kvöld.

Af þeim hugmyndum sem hafa litið dagsins ljós má nefna:

Opið grill – Fjallgöngur - Hjólaferðir - Hópferðir í Nauthólsvík – LARP bardagar – Ferðir í listasöfn – Fatamarkaðir – Tónleikar – Game of Thrones spil – Örnámskeið í stenslagerð og götulist – Listgjörningar og margt fleira.

Þess má geta að skapandi sumarstörf Molans eru með stafsstöðvar sínar í Molanum og því eitthvað um að vera á hverjum degi. Dyrnar standa öllum ungmennum bæjarins ávallt opnar fyrir fólk sem vill taka þátt í tómstundastarfi í áfengis- og vímaefnalausu umhverfi.

Í sumar býður Kópavogsbær fötluðum ungmennum, 16 til 20 ára sumarvinnu hjá bænum eins og gert var í fyrsta sinn síðastliðið sumar. Um er að ræða atvinnu- og tómstundaúrræði sniðið að þörfum hvers og eins.

Í sumarstarfi fatlaðra er lögð áhersla á fræðandi og uppbyggilega nálgun, sem til viðbótar við hefðbundna sumarvinnu hjá bænum, lítur að kynningu á almennum vinnumarkaði.

Fyrirkomulag er eftirfarandi:

• Hópurinn samanstendur af fötluðum ungmennum sem ráðin eru til vinnu hjá Kópavogsbæ í 6 vikur.
• Ungmennin eru ráðin hjá Kópavogsbæ sem heldur utan um verkefnið.
• Ungmennin fái að sækja tímabundna vinnu hjá fyrirtækjum og stofnunum í bænum.
• Ungmennin vinna störf sem hæfa hverjum og einum á þessu 6 vikna tímabili sem um ræðir.
• Einn starfsmaður fylgir allt að tveimur ungmennum og aðstoðar þá í verkefnum dagsins.

Ráðinn verður verkefnastjóri sem mun hafa umsjón með verkefninu. Nánari upplýsingar veitir Andri Lefever, forstöðumaður Molans. Netfang: andri (at) molinn.is Sími 570 1646 eða 840 2609.

Ungu hæfileikafólki býðst að vinna að eigin verkefnum í Molanum í sumar. Kópavogsbær hefur undanfarin ár gert ungmennum bæjarins kleift að vinna að listum sínum og miðla til annarra.

Í sumar munu 30 aðilar vinna að skapandi verkefnum og glæða bæinn lífi. Töluverður fjöldi hópa og einstaklinga sótti um þau 30 störf sem í boði eru. Um er að ræða fjölbreytt og ólík verkefni sem þó hafa það sameiginlegt að vera hugarfóstur ungra Kópavogsbúa sem langar að taka þátt í þessu skemmtilega verkefni.

Á hverju ári sækir fjölbreyttur hópur fólks um starf, td. leikarar, tónlistarfólk, hönnuðir, ljósmyndarar, dansarar o. fl. Þessir hópar og einstaklingar skipuleggja uppákomur í bænum yfir sumartímann. Verkefnin höfða til mismunandi aldurshópa, og algengt er að fara á leikskóla bæjarins og gleðja börnin sem þar eru. Þátttaka í 17. júní hátíðahöldum er upplögð en þar að auki er staðið fyrir óvæntum uppákomum víðs vegar um bæinn. Sumrinu er svo slúttað með allsherjar uppskeruhátíð þar sem allir þátttakendur sýna afrakstur sumarsins á einn eða annan hátt.

Hægt verður að fylgjast með starfi sumarsins hér á síðunni.

Músíktilraunir voru haldnar í lok mars mánuðar. Við í Molanum viljum þakka þeim sem tóku þátt fyrir frábæra tónleika. Við viljum sérstaklega óska kópavogsfólkinu okkar, Útrás, Cleetus the Fetus og The Lovely Lion, til hamingju, þið stóðuð ykkur öll eins og hetjur. Við tókum upp nokkur atriði og er þau nú komin á þútúbuna.

Tjekkið á þeim með því að ýta HÉR

Þessi mynd tengist fréttinni ekki neitt. Okkur finnst hún bara fyndin.

Það er ógó mikið um að vera
í Molanum í vor, meðal annars:

Húsráð Molans
Vilt þú hafa áhrif?
Ungt fólk á að láta í sér heyra og Molinn vill húsráð. Molinn greiðir götuna fyrir ungt fólk sem vill hafa áhrif og stuðla að umbótum. Ef þú hefur áhuga á að taka þátt í húsráði, hafa áhrif á starfsemi Molans og fá tækifæri til að koma skoðunum ungs fólks á framfæri skaltu hafa samband.  Það er ekki nóg að hafa skoðanir, það þarf að koma þeim á framfæri!
————————–
Þjófstart
Ekki bíða eftir að hlutirnir gerist – láttu þá gerast
Ekkert að gera? Ekki í skóla? Þjófstart í Molanum er þá klárlega málið!  Við erum að leita að ungum atvinnuleitendum til að vera með í skemmtilegum pakka. Atvinnumöguleikar sumarsins, skapandi verkefni, ferð til Danmerkur, góður félagsskapur og margt fleira. Sendu okkur póst á molinn@molinn.is og kynntu þér málið.
————————–
Ungaló
Fyrir ungar bumbur
Ungaló er meðgöngugrúppa fyrir stelpur 20 ára og yngri. Markmiðið er að hittast reglulega, spjalla, fá stuðning, fræðast og gera eitthvað skemmtilegt. Molinn tekur vel á móti öllum með góðri aðstöðu, hrikalega kósý stemningu og agalega næs fólki. Ljósmæður mæta í heimsókn og spjall og við kynnumst hvaða þjónusta er í boði fyrir konur, fyrir og eftir fæðingu.
————————–
Listasmiðjan
Verum skapandi í vor
Ert þú til í að setja upp fatasýningargjörning með okkur í vor? Við eigum saumavélarnar, gömul föt finnum við víða og hug­vitið kemur frá ykkur. Getum líka þrykkt lógó og merki á flíkurnar. Einnig höfum við akrílmálningu, sprey og striga til brúks.
————————–
Tónleikar á stóra sviðinu
Fullt af klikkuðum tónleikum
Molinn elskar músík og gerir mikið af því að bjóða upp á frábæra tónleika. Fjölmargar hljómsveitir hafa komið fram í Molanum og eitt af markmiðum okkar er að skapa hljóm­sveitum aðstöðu.  Við hjálpum líka til við auglýsingagerð og allan undirbúning við tónleikahald. Ef þú hefur áhuga á að halda tónleika eða vantar æfingaaðstöðu, endilega kíktu við og sjáðu hvað er í boði!
————————–
Molamótið í FIFA
Ekki í formi? Ekkert mál
Í vor verður haldið fyrsta Molamótið í FIFA 2012. Mætið galvösk til leiks, tvö í liði, og sannið ykkur sem bestu fótboltamenn heims (en þú veist… í tölvuleik). Milli leikja verður horft á Stöð 2 Sport, úrslitin rædd við fagmenn og tekið mini-tournament í Fússball.
————————–
Skapandi sumarstörf
Í sandölum og ermalausum bol
Undanfarin ár hefur Kópavogsbær veitt ungu fólki tækifæri til að taka þátt í Skapandi sumarstörfum og vinna þar að eigin verkefnum yfir sumartímann. Lumar þú á góðri hugmynd? Býrð þú yfir villtri sköpunargáfu? Þráirðu ekkert heitar en að þroska hæfileikana í skemmtilegu umhverfi? Þá eru Skapandi sumarstörf fyrir þig! Kíktu við og fáðu frekari upplýsingar um umsóknaferli og umsóknarfrest. Ekki missa af þessu!
————————–
Ísmolahittingur
Fyrir allra svalasta fólkið
Ísmolarnir er hópur ungmenna með sérþarfir sem hittist vikulega í Molanum. Þá er horft á vídjó, spilað pool, borðað saman, farið í keilu og margt fleira skemmtilegt. Heyrðu í okkur og fáðu að vita meira! sendu tölvupóst á dagny@kopavogur.is.
————————–
Molinn og Rauði Krossinn
Gaman saman
Molinn og Kópavogsdeild Rauða Krossins hafa verið í frábæru sam­starfi allt frá byrjun. Saman höfum við boðið upp á náms­aðstoð, málþing, palenstínskt kaffihús, fatamarkaði, skipti­dóta­markað, stærðfræðivini og íslenskukennslu fyrir út­lendinga.
————————–
Súpukvöld í Molanum
Aspas eða humar?
Hverjum finnst ekki gott að gæða sér á gourmet-súpu við tækifæri? Í vor verða reglulega haldnir súpufundir. Hittumst, eldum súpu, spjöllum, borðum, bökum, glápum á vídjó, spilum eða bara hvað sem er.  Allir sem kunna að meta góða súpu eru velkomnir.
————————–
Leiktækjasalurinn Molinn
Manst þú eftir spilakössunum?
Í vor ætlum við að vera old school og smíða spilakassa frá grunni. Svo ætlum við að spila Street Fighter.  Við leitum að fólki (nördum) sem vilja vera með í að smíða gripinn. Ef þú veist eitthvað um snúrur eða kannt að smíða eða ert rosalegt leikjanörd… ekki hika við að hafa samband.
————————–
LAN aðstaða
Noobs velkomnir
Molinn er sannkallaður sælureitur tölvuleikjalúðans. Hér höfum við nóg pláss, fullt af borðum og stólum, mjög góða nettengingu, sjoppu sem selur nammi og gos, örbylgjuofn, samlokugrill, ísskáp… allt sem þarf fyrir 48 klst. LAN. Heyrðu bara í okkur og bókaðu tíma… ókeypis.

Við í Molanum þurfum á aðstoð að halda við að smíða retro spilakassa. Okkur langar að smíða hann frá grunni, plögga inn túbusjónvarpi, gamalli PC tölvu og fylla hana af klassískum arcade leikjum. Við þurfum samt á ÞINNI hjálp að halda af því að við erum ekkert sérlega klár í að smíða eða tengja snúrur og þannig. Við þurfum smiði til að búa til sjálfan kassann/skápinn, rafvirkja til að tengja stjórntækin og þess háttar, listamenn til að pimpa skápinn og tölvunörda til að installa leikjum inná tölvuna.

Viltu vera memm?

Það er komið að fyrsta hittingnum hjá Ungaló mánudaginn 16. janúar kl. 16 hér í Molanum.

Ungaló er meðgöngugrúppa fyrir stelpur 20 ára og yngri. Markmiðið er að hittast reglulega, spjalla fá stuðning, fræðast og gera eitthvað skemmtilegt.

Viltu frekari upplýsingar? Hafðu samband við Írisi á netfangið iris@molinn.is eða hringdu í síma 570-1646.

Verið velkomnar og gleðilegt 2012.

Jólamánuðurinn er ekkert nema yndislegur í svona snjó og frosti, og skal goðum, guðum og öðrum góðum vættum þakkað vel og innilega. Námsverið kláraðist á föstudaginn og lunginn af menntskælingum að ljúka jólaprófunum svo það má skella á með smákökubyl og kósýljósum.

Niðurtalning er hafin í nýtt ártal en við skulum ekki fara of geyst því nú hefst jóladagskráin fyrir alvöru í Molanum. Ekki láta þér leiðast, það er nóg um að vera:

Fimmtudagur 15. desember
Street Art sýning hefst kl. 20. Stensl, sprey, pólitík og allur fjárinn. Ögrandi sölusýning með flottum verkum! Kynntu þér hvað gestirnir okkar hafa verið að gera, hægt að sjá myndir á Facebook.

Föstudagur 16. desember
Leikhúsförðun kl. 14-16. Seinni tíminn á framhaldsnámskeiðinu hjá Nenítu. Munið að mæta með dót og gervi :)
Tónleikar kl. 19.30. Frábærar hljómsveitir sem stíga á stokk og hrista upp í þér fyrir jólin! Metall, dauðametall, rokk og pönk. Aldurstakmark 16 ár og ókeypis inn.

Þriðjudagur 20. desember
Nú hefst tjillið og jólaundirbúningurinn enda aðeins nokkrir dagar í hátíðina.
Jólakonfektgerð kl. 16. Súkkulaði er snilldar uppfinning og fer best vel bráðið í munni.
Jólabíó kl. 20. Griswold-fjölskyldan bætir, hressir og jólakætir í hinni sígildu Christmas Vacation.

Miðvikudagur 21. desember
Allir eru í jólaskapi og aðföng eftir því :) Jólabíó um kvöldið!
Jólaföndur, jólakort, jólagjafainnpökkun og jólastensl kl. 14-18.
Kl. 19.00 LOTR: Fellowship of the Ring

Fimmtudagur 22. desember
Áframhaldandi jólastúss fyrir þá sem eru á síðustu stundu. Kakó og rjómi og mandarínur og piparkökur og seinni tvær myndirnar í tríólógíunni frá Peter Jackson.
Kl. 14.00   LOTR: Two Towers
Kl. 18.00   LOTR: Return of the King

Föstudagur 23. desember.
Lokað á Þorláksmessu. Gleðilega skötu öllsömul :*

Þriðjudagur 27. desember
Opið frá kl. 10-16

Miðvikudagur 28. desember
Opið frá kl. 10-16

Ungaló eða U20 er meðgöngugrúppa fyrir þær sem eru yngri 20 ára. Aðaltilgangurinn er að hittast reglulega, spjalla, fá stuðning, fræðast og gera eitthvað skemmtilegt í góðum félagsskap. Molinn tekur vel á móti öllum með góðri aðstöðu, hrikalega kósý stemningu og agalega næs fólki.

Fræðsla verður um þá þjónustu sem er í boði fyrir konur fyrir og eftir fæðingu og upplýsingar um sniðug námskeið sem hægt er að sækja. Ljósmæður kíkja einnig í heimsókn og svara spurningum um allt á milli himins og jarðar.

Fyrir frekari upplýsingar um Ungaló hafðu þá endilega samband við Írisi, netfangið er iris@molinn.is og gsm. 848-7672.

Ekki hika við að adda Molanum á Facebook, þar er hægt að sjá myndir og fylgjast með hvað er í gangi hverju sinni.

Ást og friður!

Breytir sér í námsver dagana 30. nóvember til 9. desember og þá verður opið mán-fös frá 10-22 á kvöldin. Frábær aðstaða og gott atmó fyrir námsmenn í prófunum. Langþráðar ristaðar beyglur, kaffi, kakó, safi og mandarínur á tilboði í Molakaffi. Púúl og fússball í pásum. Og það er meira…

Ókeypis námsaðstoð í stærðfræði! Hún getur verið pain en það er hægt að kippa því í lag. Ekki sitja ein/n heima með vandamálin, mættu í Molann eftirfarandi daga og fáðu hjálp:

16.00-18.00 Fimmtudagurinn, 1. desember

16.00-18.00 Mánudagurinn, 5. desember

16.00-18.00 Fimmtudagurinn, 8. desember